24 қараша, 12:22
Елорда аумағында орнласқан аураханалардың біріндегі медицина қызметкері есірткі сатты деген күдікке ілінді. Көліктегі полиция департаменті мен Мемлекеттік күзет қызметінің бөлімшелері бірлесіп, жедел-іздестіру іс-шараларын жүргізу кезінде аса ірі мөлшерде есірткі өткізгені үшін елордалық ауруханалардың бірінде медицина қызметкері ұсталды.
Медициналық ұйымдағы жұмыс орнын тінту кезінде ұсталған ер азаматтың жеке шкафында ерекше иісі бар сұр-жасыл түсті ұнтақ заты бар 4 полиэтилен орамы тәркіленді. Ол жалпы салмағы 240 грамнан астам «гашиш» есірткі заты болып шықты. Бұл қолданыстағы заңнамаға сәйкес «аса ірі мөлшер» болып табылады.
Көліктегі Полиция департаментінің мәліметінше, аталған факті бойынша Қылмыстық кодекстің 297-бабы 3-тармағының 3-бөлігі (Есірткі, психотроптық заттарды, олардың аналогтарын аса ірі мөлшерде өткізу немесе өткізу мақсатында заңсыз сатып алу, сақтау) бойынша сотқа дейінгі тергеу жүргізілуде. Күдікті уақытша ұстау изоляторына қамалды.
