24 қараша, 12:12
Ақмола облысы Астрахан ауданында 48 жастағы тұрғын достарымен балық аулауға барамын деп көлігінен айырылды. Жәбірленушінің айтуынша, өзіне тиесілі "Mercedes-Benz 201D" маркалы автокөлігін ұрлап кеткен. Келтірілген шығын көлемі - 3 миллион теңге.
Белгілі болғандай, орта жастағы ер кісі екі досымен бірге балық аулауға барған. Діттеген жерге келген соң көлік ішінде бір досы қалып, екіншісімен бірге көлге қарай бет алған. Қайтып оралғаннан кейін көлік орнында болмай шыққан. Оның ішінде қалған досы да белгісіз бағытқа кетіп қалған. Ол Солтүстік Қазақстан облысы Ғ.Мүсірепов атындағы ауданның 33 жастағы тұрғыны екен.
Ақмола облыстық Полиция департаментінің мәліметінше, аталған фактіге сәйкес Қылмыстық кодекстің 200-бабы (Автокөлікті немесе өзге де көлік құралын жымқыру мақсатынсыз құқыққа сыйымсыз иеленіп алу) бойынша сотқа дейінгі тергеп-тексеру басталды. Көлік ұрлау дерегі бойынша жәбірленушінің досы күдікті болып отыр. Полицейлер оның жүрген жерін анықтау үшін жедел-іздестіру іс-шараларын жүргізуде.
