СІМ: Оңтүстік Кореяда жүрген Қазақстан азаматы коронавирусқа шалдықпаған

"2020 жылдың 3 наурызында Оңтүстік Кореяның әлеуметтік желілерінің орыс тілді топтарында Оңтүстік Кореяда заңсыз жүрген ҚР азаматының COVID-19 коронавирусқа шалдыққаны туралы ақпарат тараған. Ондағы мәліметте, Қазақстан азаматы клиникадан қашып кетіп,оны полиция іздестіріп жатқаны айтылады. Бұл ақпаратты "Хабар 24" телеарнасы да таратты. Алайда Оңтүстік Кореядағы Қазақстан елшілігі бұл ақпараттың анық-қанығын жеткізу мақсатында жұмыстар жүргізіп, ол мәлімет расталмағанын мәлімдеді",-деді Айбек Смадияров.

Оның айтуынша, Қазақстан азаматынан жергілікті полициядағылар түсінік алған. Ол өз сөзінде ешқанадй да клиникаға бармағанын және коронавирустың бар-жоғына қатысты қандай да бір талдау жасалынбағанын айтқан.

Оңтүстік Корея полициясының ақпараты бойынша, аталған елде заңсыз жүрген қазақстандық коронавирус дерті анықталған адам жүрген дәмханада болған. Сондықтан қазақстандық енді жергілікті дәрігерлердің бақылауында. Оған күн сайын қоңырау шалып, денсаулық жағдайы бақылауға алынды. Қазіргі таңда отандасымызда ауру белгілері жоқ.

Айта кетейік, Оңтүстік Корея коронавирус таралу деңгейі жоғары елдер тізіміне енген. Бүгінгі таңда аталған елде 35 мың қазақстандық бар, оның 12 мыңы заңсыз жүргендер.