Қазақстан Республикасы Орталық сайлау комиссиясы интернет желісінде әлеуметтік сауал салуларды жүргізу жағдайларының жиілеуіне байланысты заңнама талаптарын сақтау қажеттілігін ескертеді. Бұл туралы ақпараттық хабар ОСК ресми сайтында жарияланды, деп хабарлайды, Elitar.kz.
«Қазақстан Республикасындағы сайлау туралы» Конституциялық заңының 28-бабының 9-тармағына сәйкес қоғамдық пікірге сауал салуды Қазақстан Республикасының заңнамасына сәйкес тіркелген, қоғамдық пікірге сауал салуды жүргізу бойынша кемінде бес жыл тәжірибесі бар заңды тұлғалар тиісті құжаттардың көшірмелерін қоса беріп, бұл туралы Орталық сайлау комиссиясын жазбаша түрде алдын ала хабардар ете отырып жүргізуге құқылы. ОСК-ға жіберілетін хабарда мыналар:
· сауал салуды жүргізуге қатысатын және осы салада жұмыс тәжірибесі бар мамандар туралы;
· қоғамдық пікірге сауал салу жүргізілетін өңірлер туралы;
· қолданылатын талдау әдістері туралы мәліметтер көрсетіледі.
Қоғамдық пікірге сауал салу нәтижелерiн, сайлау, сайлауға байланысты өзге де зерттеулер, кандидаттарды не саяси партияларды қолдап дауыс беру нәтижелерiнiң болжамдарын дауыс берiлетін күннің алдындағы бес күн ішінде және дауыс берiлетiн күні интернет желісінде жариялауға жол берілмейдi.
Бүгінгі күні әлеуметтік зерттеулерді жүргізу туралы тиісті түрде ресімделген хабарлар Орталық сайлау комиссиясына екі ұйымнан ғана: «Қоғамдық пікір» институты қоғамдық бірлестігінен және «Жастар» Ғылыми-зерттеу орталығы» ЖШС-нан келіп түскен.
