Кентауда полиция капитаны қызметтік көлікпен жас қыздарды тасыған

17 қараша, 14:11

Түркістан облысы Кентау қаласында қызметтік көлікпен жас қыздарды тасыған учаскелік полицейдің видеосы пайда болды. Бейнежазбаны @egov.press Telegram-каналы жариялады.

Видеоны полицейдің артынан қуып келген куәгерлер түсіріп алған. Олар тәртіп сақшысын тоқтатып, неліктен жас қыздарды тасып жүргенін сұрайды. Алайда полицей нақты жауап бере алмайды. Бар болғаны, көлікте өз қарындасы отырғанын айтады.

Түркістан облыстық Полиция департаментіндегілер бұл оқиға бойынша қызметтік тексеруді бастады.

Оқиға 11 қараша күні кешкі сағат 22:00-де болған екен. Тәртіп сақшысының айтуы бойынша, туыс қарындастары өтініш жасаған соң жолдан мінгізген.

«Бүгінгі таңда Түркістан облысы Полиция департаменті басшылығының тапсырмасымен қызметтік тексеру жүргізілуде. Ал қызметтік көлік басқарған полицейдің жол ережесін бұзғанына байланысты Әкімшілік құқықбұзушылық туралы кодекстің 595-бабының 1-бөлігімен "Маневр жасау қағидаларын бұзу" хаттама толтырылды»,-деді Полиция департаментіндегілер.

Тегтер: Қазақстан жаңалықтары