Өзбекстанның бас прокуратурасы елдің тұңғыш президентінің қызы Гүлнара Каримоваға қатысты жаңа қылмыстық істер қозғады, - деп хабарлайды Elitar.kz тілшісі ведомствоның баспасөз қызметіне сілтеме жасай отырып.
"Қылмыстық іс қозғауға халықаралық White and Case заңгерлік компаниясынан және халықтан келіп түскен хаттар негіз болды", - делінген хабарламада. Тергеу мәліметінше, Каримова тағы бірнеше адаммен алдын ала келісіп, мемлекетке тиесілі "Кувасайцемент" және "Бекабадцемент" АҚ акцияларын төмен бағамен сатып алып, кейін акция пакеттерін заңсыз түрде шетелден келген кәсіпкерлерге сатып отырған. Осылайша Каримова мемлекетке аса ірі көлемде шығын келтірген.
Прокуратурадағылар тергеу мүддесіне сәйкес басқа мәліметтер жарияланбайтынын айтты.
Еске салайық, Гүлнара Каримова 2015 жылдың тамызында 5 жыл бас бостандығынан айырылған болады.
