30 қыркүйек, 09:37
5 қазаннан бастап Қазақстан Түркияға рейстерді қысқартады. Бұл туралы Үкімет отырысында Денсаулық сақтау министрі Алексей Цой мәлімдеді.
"Шет елдердегі эпидемиологиялық ахуалдың нашарлауын ескере отырып, Қазақстанда КВИ – дің әкелінуі мен таралуының алдын алу мақсатында 5 қазаннан бастап басқа елдермен қосымша әуе қатынасын қалпына келтіруді тоқтата тұру, рейстер жаңартылған елдермен рейстер санын ұлғайтпау, Түркия Республикасына рейстер санын қысқарту ұсынылады", - деді Денсаулық сақтау министрлігінің басшысы.
Екінші санаттағы елдерден келетін адамдар үшін мынадай міндетті талаптар белгіленген: термометрия, сауалнама жүргізу, алған күні үш тәуліктен кешіктірілмей өткен КВИ-ға зерттеп-қарау туралы анықтаманың болуы.
"Анықтама болмаған жағдайда, келгендер КВИ-ға зертханалық зерттеу жүргізу үшін карантиндік стационарда екі тәулікке дейін оқшауланады. Осындай талапты ЕАЭО елдерімен және Өзбекстанмен өткізу пункттерінде, авиаөтпелерде мемлекеттік шекараны кесіп өтетін тұлғалар үшін қолдану ұсынылады. Осыған байланысты облыстардың, Нұр-сұлтан, Алматы және Шымкент қалаларының әкімдеріне мемлекеттік шекарадан өтетін жерлерде карантиндік стационарлардың өрістетілуін және келетін адамдарды тестілеуді қамтамасыз етуді тапсыруды сұраймын", – деді Цой.
