Шымкентте әйелінің көңілдесін пышақтап өлтірген ер кісі 11 жылға сотталды

25 ақпан, 19:20

Шымкент қаласы қылмыстық істер жөніндегі мамандандырылған ауднаралық сотында жұбайының ашынасын өлтірген ер адам 11 жылға сотталды, деп хабарлайды Elitar.kz тілшісі.

Ерлі-зайыптылар шағынаудандардың бірінде шағын азық-түлік дүкенін ашып, тірлігін дөңгелетіп жүрген. Тауар жеткізіп беруші жігітпен 30-35 жастағы әйел көңіл қосып, махаббат үштігінен бір-ақ шығады. Сезімге бой алдырып, нақсүйеріне құлай кеткені соншалық, оған қымбат сыйлықтар жасап, тіпті банктен өз атынан несие де рәсімдеп берген. Көңілдесі болса, несиенің аз ғана бөлігін төлеп, кейін мүлдем төлемей қойған көрінеді.

Әйелінің көзіне шөп салып жүргендігі туралы ел аузындағы сыпсың сөздерді естісе де күйеуі алғашқыда сене қоймапты. Тек банктен 800 мың теңге несие мен өсім ақша туралы ресми хабарлама келгенде ғана әйелінің суық жүрісінен секем алған. Сұрақтың астына алып, көңілдесі бар екендігін, несиені соған әпергендігін мойындатады. Ашуға әбден бой алдырған күйеуі әйелінің ашынасымен кездесуге барған. Қолындағы асхана пышағымен жәбірленушінің бірнеше жерінен жарақаттайды. Алған дене жарақаттарынан көңілдес-жәбірленуші ауруханада жан тәсілім етті. Бұл туралы Шымкент қалалық қылмыстық істер жөніндегі мамандандырылған ауданарлық сотының судьясы Әбинұр Қарабаев хабарлады. Айта кету керек, сот үкімі заңды күшіне еніп қойды.