Шымкентте инвестиция жұмылдыру саласының жетекші сарапшылары, министрліктер мен мемлекеттік органдар, қаржы институттары мен білім беру ұйымдарының өкілдері, қысқасы бизнес саласының алып тұлғаларының қатысуымен алғашқы халықаралық инвестициялық форум өтті. Онда тек Қазақстан емес, Германия, Дания, Ресей, Канада, Испания, Оңтүстік Корея, БАӘ және Өзбекстанның белгілі компанияларының жетекшілері де болды.
Қалалық әкімдіктің баспасөз қызметінің мәліметінше, шаһар басшысы мегаполисті дамытудың жоспарлары туралы баяндама жасады.
- Жақында Сеул қаласында болдым. Онда біздің Қошқар атаға ұқсас өзен бар. Соның жобасын көрдім. Біз де Қошқар ата өзенінің аумағын соған ұқсас жобамен көркейтеміз. Бұған қоса Шымкенттің көне қалашығы мен Цитаделі аспан астындағы ашық музейге айналады. Римнің Колизейі сияқты Цитадель де Шымкенттің көрікті әрі тарихи орынға айналады. Ал бүгін баршаңызды қаладағы Арбатты аралауға шақырамын, - деді Ғабидолла Әбдірахымов.
Форумның басты мақсаты – Шымкенттің Қазақстан мен Орталық Азиядағы инвестиция жұмылдырудың жаңа орталығы ретінде даму әлеуеттерін талқылау, мегаполистің алыс және жақын шетелдермен әріптестігін кеңейту, көлік логистикасын жетілдіру, туризмінің дамуы мен қолайлы инвестициялық климаттың қалыптастыруын талқылау. Форумға қатысушыларға Шымкенттің даму стратегиясы мен қаланың инвестициялық мүмкіндіктері таныстырылды. Ірі қалалардағы бизнес жүргізу мәселелері, кәсіпкерлікке мемлекет тарапынан көрсетілетін қолдаулардың жергілікті және орталық деңгейлерде жүзеге асырылуы мұқият талқыланды.
Форум жұмысы «Даму стратегиясы», «Инвестиция жұмылдыру», «Адам капиталын дамыту», «Туризмді дамыту» атты төрт секция бойынша өтті. Спикерлер ретінде шетелдік сарапшылар да сөз сөйледі.
Форум аясында 200 млн АҚШ долларды құрайтын 11 меморандумға қол қойылды. Тарқатып айтқанда, қала әкімі Ғ.Әбдірахымов пен «Hyundai Trans Auto» ЖШС директоры В.Вяткин және «MAYDAY KAZKHSTAN» ЖШС төрағасы А.Хидаят арасында үш жақты әріптестік меморандумы түзілді. Оның аясында қалалық жедел жәрдем қызметінің автопаркін жаңғырту үшін 13 млн АҚШ доллары көлемінде инвестиция жұмылдырылмақ. Оған қоса «Colosseo» компаниясының президенті Ян Енча мырзамен Қажымұқан атындағы орталық стадионды қайта жаңарту жұмыстары бойынша 40 млн АҚШ долларлық келісімге қол қойылды. Сонымен қатар Шымкентте микрофибралы тоқыма фабрикасы салынатын болды. Ал Шымкент-сити аумағында тұрғын үйлер мен әкімшілік ғимарат, жаңа саябақтың салу секілді бірқатар ірі жобаларға инвестиция салынады деп күтілуде.
