Сенат депутаты Дариға Назарбаева Қазақстан журналистері конгресі атқару комитетінің төрайымы ретінде күні кеше ғана БАҚ өкілдерін аккредитациялауға қатысты шыққан бұйрықпен танысып, егжей-тегжей зерттеуге уәде берді, деп хабарлайды Sputnik Қазақстанға сілтеме жасап Elitar.kz.
"Қазіргі заманда журналистердің аузын жабуға болмайды. Қазір интернет арқылы өз ой-пікірін ашық айтуға мүмкіндік бар. Журналистер әрқашанда елдің қамын ойлайды, халықтың мұң-мұқтажын үкіметке жеткізеді. Бұл жағынан журналистердің рөлі өте маңызды", - деді Назарбаева.
Бұдан өзге сенатор елімізге мықты журналистік қоғам керек екенін де атап өтті.
"Журналистер одағы деген бар, бірақ оның атын да естімейміз, не істеп жатқанынан да бейхабармыз. Өз салаларыңа қатысты заң жобасы қаралып, талқыланып жатқанда, ой-пікірлеріңді айтып, үкіметпен бірге жұмыс істеп, күресе білу керек. Өкінішке қарай, журналистік қоғам бұл мәселелерде белсенді емес", - деді ол.
Еске сала кетсек, бұған дейін Қазақстанда журналистерді іс-шараларға аккредитациялау ережелері қатаңдатылуы мүмкін деген ақпарат шыққан болатын. Тіпті енді кейбір шараларда журналистің еңбек келісімшартының көшірмесі де талап етілуі мүмкін.
