Риддерде 22 мың адам жылусыз қалды. Қалада шұғыл құрылған штаб жұмыс істеп жатыр, деп хабарлайды Elitar.kz Orda.kz сайтына сілтеме жасап. Бұл туралы Шығыс Қазақстан облысының әкімі Даниал Ахметов Instagram парақшасында хабарлады.
«5 қарашада сағат 20.00-де жылу орталығында күл шығару жүйесінде сорғы істен шығып, №1 қазандық блогының қосалқы жабдықтары апатты жағдайда тоқтатылды. Риддер қаласының 22 мыңнан астам абоненті үшін жылу беру қуаты төмендетілді», - делінген хабарламада.
Мәселені шешу үшін Риддерде шұғыл түрде тәулік бойы әрекет ететін жедел штаб құрылды. ЖЭО-ға Согринская және Өскемен ЖЭО-ларының, «УКА жылу желілері» АҚ, «ОЭСК» АҚ (РЭК) мамандары тартылды.
Сонымен қатар, ЖЭО-ға 120 тонна мазут жеткізілді, жанармай жөнелту жалғасуда.
Бұл төтенше жағдай жергілікті төтенше жағдай ретінде жіктеледі.
