Қостанайда жалған полицей тұрғыннан ақша бопсалаған. Күдіктіні ұстау операциясын облыстық Полиция департаментінің өзіндік қауіпсіздік және ұйымдасқан қылмысқа қарсы күрес басқармаларының қызметкерлері жүргізді. Polisia.kz мәліметінше, полицияға облыс орталығының тұрғынынан өтініш келіп түскен. Ол өзін ұйымдасқан қылмысқа қарсы күрес бөлімшесінің қызметкері деп таныстырған белгісіз ер адамның ақша бопсалағанын хабарлады. Өтініш берушінің барлық дәлелдері мұқият тексеріліп расталған.
«Бірлескен жедел іс-шаралар нәтижесінде Қостанай облысы ПД Ұйымдасқан қылмысқа қарсы күрес және Өзіндік қауіпсіздік басқармаларының қызметкерлері 27 жастағы күдіктіні Қостанай қаласындағы жалдамалы пәтерлердің бірінде ұстады. Қазіргі уақытта ол қаамуға алынды, тергеу амалдары жүргізілуде», – делінген ведомство мәліметінде.
