Шымкентте 3 қарашада орын алған қайғылы оқиғаның мән-жайын зардап шеккен отбасының туыстары айтып берді. Естеріңізге сала кетейік, улану салдарынан екі кішкентай бала көз жұмды. Туыстардың пікірінше, бұл жағдай танымал маркалы түшпараның салдарынан орын алып отыр.
Шымкентте бір отбасының екі баласы уланудан қайтыс болды. Қайғылы оқиға үшінші қарашада орын алған. Туысқандарының айтуынша, отбасы түшпарадан уланған. Олардың пікірімен ТЖ қызметінің өкілдері де келіседі. Дәрігерлер болған қайғылы жағдай тағамнан уланумен байланысты болмауы мүмкін деп отыр. Бірақ соған қарамастан қайғылы жағдай орын алған отбасы дүкеннен сатып алған түшпараның барлығы тәркіленді.Қайғылы оқиға Алдияров көшесіндегі үйлердің бірінде орын алған. Сол күні кешке қарай отбасы мүшелері тамақтанып, кейін түнгі уақытта оларға медициналық көмек қажет болды. Орын алған жайтқа қатысты отбасының көршілері былай деп отыр:
"Біз таңертең сағат сегіз жарымдар шамасында ол үйге жедел жәрдем қызметі келгенін көрдік. Олар отбасы мүшелерін алып кетті. Ал кейінірек, сағат он бірден кейін ол үйге төтенше жағдай қызметкерлері мен полицейлер келді. Пәтерде газдың иісі болмады. Олар өлшеулер жасап кетті, ал ас үйде түшпара орамасы жатқан", - деп еске алады көршісі Эльмира Байжанова.
ТЖ мамандарының айтуынша, жедел жәрдем үйге екі рет шақыртылған. Бірінші бригада көмек көрсетіп кеткен. Бірақ таңертең отбасы мүшелерінің жағдайы тағы да нашарлай бастаған. Сол кезде отағасы екінші бригаданы шақырады. Олар барлығын ауруханаға жеткізді. Дәрігерлер келіп түскеннен кейін жарты сағат бойы төрт жасқа әлі толмаған баланың өмірі үшін күрескен, бірақ ештеңе істей алмады. Таңертең 11-де бала қайтыс болды. Үш сағаттан кейін оның 11 айлық інісі де көз жұмды. Төтенше жағдайлар өкілдерінің пікірінше, отбасы тамақтан уланудан зардап шеккен. Бірақ газдан улану болмады деп айтуға әлі ерте, дегенмен ықтималдық пайызы төмен.
"Біздің мамандар сол жерге барып, барлығын көрді. Үй газдандырылмаған. Улы газбен улануды болжау үшін аристон немесе газ колонкасының ешқайсысы да жоқ. Сондай - ақ, тамақтан улану мен газбен улану белгілері де әртүрлі", - дейді Шымкент қалалық ТЖД басшысы Нұрболат Дербісов.
Дәрігерлер белгісіз затпен уланған дегенді алға тартып, ол газдан улану болуы мүмкін екенін жоққа шығармады. Себебі ауруханаға келіп түскен балалардың ата-анасы газ баллонының бұрамасы ашық қалып қойғанын айтқан. Олар жедел жәрдем қызметі бірінше рет келген кезде өздері ауруханаға жатудан бас тартқан екен.
"Алдымен науқастардың барлығы жұқпалы аурулар ауруханасына жеткізіліп, шаю шарасы жасалды. Содан кейін дәрігер анасын және үш баланы гипербариялық оксигенация орталығына жіберді. 2015 жылғы баланың жағдайы ауыр болғандықтан, реанимациялық палатада көмек көрсетіле басталды. Бірақ бала көз жұмды. Кейін токсикологияда 2018 жылы дүниеге келген екінші бала қайтыс болды. Жедел жәрдем бригадасы алғаш елген кезде ата-анасы оларды ауруханаға жатқызудан бас тартты. Ал балалардың жағдайы нашарлап кеткен", - деді Шымкент қалалық денсаулық сақтау басқармасының бөлім басшысы Инна Глазебная.
"Олар бірінші рет келген кезде балаларды алып кетпеді. Тек қажетті дәрілер тағайындап, кетіп қалған. Ал олардың жағдайы нашарлай берген. Жедел жәрдем бригадасы екінші рет келген кезде оларды ауруханаға алып кеткен. Менің ойымша, бұл газбен улану емес. Өйткені сол кеште ол үйге жиені келген. Отбасы көрші дүкеннен сатып алған түшпараны кешкі асқа дайындаған. Жалғыз сол бала (қонаққа келген туысы) түшпарадан бас тартқан. Ал қалғандары уланған. Егер газдан болған болса, ол туысы да ауруханаға түсер еді", - деді телефон арқылы зардап шеккендердің туысы Арайлым Батаева.
ҚР Денсаулық сақтау министрлігі тауарлар мен қызметтердің сапасы мен қауіпсіздігін бақылау комитеті тергеу қорытындысын күтуді ұсынады.
"Әзірге болған оқиғаның себебі туралы нақты деректер жоқ. Тергеу жүргізілуде, сот-медициналық сараптама нәтижелері, талдаулар ертең дайын болады, түпкілікті жауапты тек ертең ғана бере аламыз. Қазіргі уақытта пропанмен улану және тамақтан улану екі нұсқа бар", – деп түсіндірді ҚР Денсаулық сақтау министрлігі тауарлар мен қызметтердің сапасы мен қауіпсіздігін бақылау комитетінің төрайымы Людмила Бюрабекова.
