Шымкентте 20 қараша күні таңғы сағат жетіден бастап, сайлау учаскелерінде дауыс беру басталды. Өз таңдауларын жасауға келгендердің алғашқылары аранйы сыйлыққа ие болды.
Арнайы сыйлық қаланың барлық сайлау учаскелерінде дайындалды. Таңғы сағат 7.20-да ең алғашқылардың бірі болып келген сайлаушылар ала бастады. Сыйлықтарды учаскелік сайлау комиссияларының төрағалары мен мүшелері табыстады. Мұндай көңіл бөлу, ілтипат, азаматтардың көңіл-күйін көтереді және дауыс беріп үлгермеген адамдарды ынталандырады.
"Көңіл-күй жақсы, алғашқы сайлаушылар арасында дауыс беруге мүмкіндік туды. Мен бұл үшін сыйлық алдым. Өте қуаныштымын. Бұл өте жақсы! Шымкенттіктерді белсенділік танытуға және өз дауыстарын беру үшін өз учаскелеріне келуге шақырамын", - деп бөлісті Абай ауданының сайлаушысы Нұрлан Бектаев.
Естеріңізге сала кетейік, дауыс беру таңғы жетіде басталып, кешкі сегізге дейін жалғасады.
ҚР Орталық сайлау комиссиясының хабарлауынша, елорда уақытымен сағат 7.15-те 2022 жылдың 20 қарашасында барлық өңірлер бойынша 8150 сайлау учаскесі дауыс беруге кірісті.
Сондай-ақ, 11 шет мемлекеттегі Қазақстан Республикасының өкілдіктері жанынан құрылған 12 сайлау учаскесі дауыс беруге кірісті.
Республикада дауыс беруге арналған барлығы 10 101 сайлау учаскесі бар. Оның ішінде Қазақстан Республикасының шет мемлекеттерінде 53 елде 68 сайлау учаскесі бар.
Ал, 86 сайлау учаскесінде аумақтық комиссиялардың қабылданған шешімдеріне сәйкес дауыс беру таңғы 6.00-де басталды.
Қазақстан Республикасының аумағындағы уақыт белдеулерінің шекараларына сәйкес 5 өңірдің: Ақтөбе, Атырау, Батыс Қазақстан, Қызылорда және Маңғыстау облыстарының учаскелері елорда уақыты бойынша сағат 08.00-де дауыс беруге кіріседі.
Жалпы тізімге 11 млн. 950 мың 485 азамат енгізілген.
Ал, учаскелік комиссиялар азаматтардың жазбаша өтініштері бойынша дауыс беру құқығы бойынша 22578 есептен шығару куәлігін берді.
