Қарағандылық полицейлер қылмыскерлерді ұстауға көмектесуді сұрайды

03 қаңтар, 11:30

Қарағанды қаласындағы «Древний Рим» мейрамханасында 1 қаңтарға қараған түні ерегіс болып, соңы топтық төбелеске ұласты. Соның салдарынан бір адам мерт болып, 3 адам пышақ жарақатын алды. Мессенджерлер мен әлеуметтік желілерде түрлі қауесеттер мен төбелес жайлы нақтыланбаған мәлімет тарап, екі адамның қаза тапқаны, төбелес ұлтаралық қақтығыс салдарынан шыққаны жайлы айтылуда.

Қарағанды облысының прокуратурасы бұл мәліметті теріске шығарып, төбелес екі топтың арасында шыққанын, қақтығыстың ұлтаралық сипатта болмағанын, әр топта қазақ және басқа да ұлт өкілдерінің болғанын мәлімдеді.

Құзырлы орган өкілдері бұған қоса тергеу барысы облыс прокурорының қатаң бақылауына алынғанын хабарлап, жалған мәлімет таратушылардың жауапкершілікке тартылатынын ескертті, азаматтарды түрлі үгіттеулер мен арандатуларға ермей, тергеу органдарының нақты мәліметтеріне назар аударуға шақырды.

3 қаңтар күні Қарағанды полициясы 1 қаңтарға қараған түні болған төбелес салдарынан 1 адам мерт болып, 3 адам пышақ жарақатын алған топтық төбелеске қатысушылар туралы мәліметтерді таратты, деп жазады Zakon.kz облыстық полиция департаментінің баспасөз қызметіне сілтеме жасап.

Ведомства өкілдерінің мәліметінше, бұл факті бойынша ҚР ҚК 99-бабының 1-тармағы (Кісі өлтіру) бойынша сотқа дейінгі тергеу амалдары басталды. Шұғыл іздестіру әрекеттері барысында полицейлер 3 азаматты анықтап, тұтқындады:

Малхасян Торгом Манвелович

Малхасян Сохак Самвелович

Надырбеков Каир Хамитович

Ұсталған азаматтарға ауыр қылмыс жасады деген айып тағылуда және Қарағанды қалалық сотының үкімімен «Қамауға алу туралы» бұлтартпау шарасы қолданылған. Қарағанды облыстық полиция департаментінің қызметкерлері бұған қоса Гурурян Нарекке іздеу жариялады.