Қазақстанда ұлттық бірыңғай тестілеу жылына 4 рет – қаңтар, наурыз, маусым және тамыз айларында өтеді. Ақылы тестілеудің бағасы – 2242 теңге. Білім және ғылым министрлігі өкілдерінің айтуынша, 2019 жылғы ҰБТ тәртібі өзгермейді, деп жазады Elitar.kz тілшісі ҚР Премьер-министрінің ресми сайтына сілтеме жасап.
Қаңтар, наурыз және тамыз айларындағы ҰБТ-ға қатысу тест тапсырушыға жоғарғы оқу орындарына ақылы оқуға құжат тапсыруға негіз болады. Қаңтар айындағы сынақта шекті балды жинаған тест тапсырушы ҰБТ сертификатымен ЖОО ақылы бөліміне түсе алады, ол үшін шекті балды жинаса болғаны. Айта кету керек, қаңтар айында ҰБТ тапсырған талапкер маусым айында негізгі ҰБТ тапсырып, мемлекеттік білім гранттарының конкурсына да қатысуына мүмкіндігі болады.
