Қайғылы оқиға 27 қарашаға қараған түні орын алды. Дәрігерлерге сағат 00.45-те үш адамның газдан уланғаны туралы хабарлама келіп түскен. Өкінішке орай 6 жастағы бала ақ халаттылар оқиға орнына келіп жеткенше қайтыс болды. Бұл туралы "ҚазТрансГазАймақ" АҚ-ына сілтеме жасап Elitar.kz хабарлайды.
Оқиға Шымкенттегі "Шығыс" шағынауданындағы көпқабатты тұрғын үйлердің біріндегі пәтерде орын алған. Газ құрылғысының дұрыс орнатылмауы салдарынан бүлдіршін көз жұмды.
Қайғылы жағдай орын алған жерге келіп жеткен арнайы бригада пәтердегі газ құрылғысының ешбір талапқа сай келмей орнатылғанын анықтады. Ауаны тазалаушы желдеткіштің болмауынан газ уақыт өте пәтер ішіне жинала берген. Ал ондағы отбасы мүшелері оны тіптен байқамаған.
Осы ретте сала мамандары газ құрылғысын вентиляциялық жүйесі орнатылған, ауаны тазалау үшін арнайы терезесі бар бөлмеге ғана орнату керектігін кезекті рет еске салады. Сонымен қатар құрылғыны тек білікті мамандар орнату қажет. Газ құрылғысын орналастыру немесе орнын ауыстыру үшін арнайы газ қызметінің рұқсатымен жүзеге асырылуы тиіс. Бұл талаптардың орындалмауы қайғылы жағдайға әкелуі мүмкін.
