Теміртауда жақын арада мүгедектігі бар адамдарға арналған сұлулық мектебі жұмыс істей бастайды, деп хабарлайды Қарағанды облыстық әкімдігінің баспасөз қызметі.
Олеся Барашкина қаланың жас тұрғындарына визаж және стиль құпияларын үйретуге ниетті. Ол инклюзивті парламентаризм орталығында оқыды, өз жобасын қорғады және 350 мың теңге көлемінде грант алды.
"Церебральды сал ауруы" диагнозы қойылған қыз нарықты зерттеп, ерекше адамдарға өздерін күтуге көмектесуді шешті. Жоба авторы өзіне сенімсіз адамнан табысты спортшы мен танымал модельге дейін қиын жолдан өтті. Қажырлы еңбегі мен өжеттілігінің арқасында Олеся пауэрлифтинг бойынша спорт шебері, чемпионаттардың бірнеше дүркін жүлдегері, Unikat-models (Германия) модельдік агенттігінің өкілі, сондай-ақ сертификатталған визажист.
– Біз әртүрлі болсақ та құқықтарымыз тең. Әркім өзінің армандаған өмірін құра алады. Менің Сұлулық мектебімді басқалардан ерекшелендіретін екі құпия бар – өзіме деген сенім және армандарды шындыққа айналдыру мүмкіндігі. Мен мұны басқа ерекше қыздарға үйретіп, олардың сұлулығы мен күшін көрсетуге қуаныштымын, – дейді Олеся. – Бұл жолды менен артық ешкім білмейді, өйткені әр қадам, әр сөз оқулықтағы сөз тіркестері ғана емес. Бұл менің трансформация тәжірибем.
By Barashkina мектебінде оқушыларға түс түрлерін анықтауға, сәндік косметиканы таңдауға, күндізгі және кешкі макияждың құпияларын үйретеді. Жобаға 13 жастан бастап барлық ниет білдірушілер қатыса алады. Ерекше қажеттіліктері бар адамдар үшін оқыту тегін болады.
– Сұлулық мектебінде макияж негіздерін оқытудан басқа, стиль сабақтары, фотопозалар және әлеуметтік желілерін жүргізу сабақтары болады. Бұл білімнің барлығын оқушылар өздерінің таланттарын монетизациялау үшін алады, – дейді Олеся.
Сұлулық мектебі "Шекарасыз" екінші фестивалі аясында жұмыс істейтін болады. Оның ұйымдастырушыларының бірі – Олеся. Оқыту онлайн режимінде де жүргізіледі. Қатысуға өтінімдерді @bez_granic.kz парақшасында беруге болады.
