Вице-президент Нұрбол Төлебаевтың жетекшілігімен «Білім-Инновация» лицейінің оқушылары үшін Мәжіліс ғимараты бойынша экскурсия ұйымдастырылды.
Оларды палата қабырғасына депутат, білім саласының бұрынғы қызметкері Жұлдыз Сүлейменова шақырды.
Жиынға депутат Мақпал Тәжмағамбетова да қатысты. Лицей оқушылары ел болашағы үшін маңызды шешімдер талқыланып, қабылданатын орындарға: бірлескен және пленарлық отырыс залдарына, кітапханаға және басқа да үй-жайлардың жұмысымен танысты.
Мектеп оқушылары депутаттарға еңбек нарығы, білім, экономика тақырыптары бойынша өз сауалдарын қойды.
Сондай-ақ көшбасшылық қасиеттерді дамытудың негізгі тетігі – отансүйгіштік, адал еңбек, сапалы білім, қоғамға пайдалы болуға ұмтылу керектігі жөнінде ақыл-өсиеттер айтылды.
Осындай танымдық экскурсиялар алдағы уақытта да өткізілетін болады.
