20 ақпан, 19:46
Жол апатында қайтыс болған азаматшаның артында төрт бірдей баласы жетім қалған.
Анасынан айырылған балалардың төрт жыл бұрын әкелері қайтыс болған. Қазір олар туыстарының қолында. Шымкент қаласы Полиция департаментінің бастығы Ералы Жұмаханбетов қамқорлықсыз қалған балаларға көмектесу үшін арнайы ауылдағы әжелерінің үйіне іздеп барып, жағдайларын көріп қайтты.
Қайырымды полицейлер марқұм аула сыпырушысының бала-ашағасына қомақты қаражат берді. Сондай-ақ, түрлі ойыншықтар тарту етті.
"Адам өміріндегі ең игі істердің бірі - мұқтаж жандарға қамқорлық жасау. Адамдар бір-біріне көмек қолын созу арқылы жақсылыққа қадам бастайды.Бұл отбасыға көмектесуді ұзақ уақыттан бері ойлап жүргенмін. Әрі қол астымдағы қызметкерлер бұл ойымда бірден қолдап, қайырымдылық жасауға ат салысты",-деді Ералы Жұмаханбетов.
Еске салайық, осыдан бір ай бұрын «ЛТД Тұрмыс» серіктестігінің жұмысшысы көше тазалап жүріп, қаза тапты. Оқыс жағдай таңертеңгі уақытта болған. Әйел жаяу жүргіншілер жүретін жолдың бетон блоктарын сыпырып жатқан. Сол уақытта қарсы беттен №69 автобусы келе жатып, әйелді қағып кетт. Ауыр соққы алған азаматша оқиға орнында тіл тартпай кетті.
