Оқиға Шымкенттегі А.Пушкин атындағы №1 мектеп гимназиясында орын алған. Қазақ тілі пәні мұғалімінің сөзінен соң баланың жағдайы нашарлапты. Бұл туралы INSTAGRAM желісінің @club_dobryakov_shymkent паблигі жария етті. Онда оқушының анасы шағым айтып, көмек сұраған.
«Мектеп директорының орынбасары әрі оқытушы өз өкілеттігін асыра отырып, айқайымен 6 сынып оқушысын жүрек ұстамасына дейін жеткізді. Оқушы ауруханаға жатқызылды. Ал мұғалім тіпті кешірім де сұраған жоқ. Сынып оқушылары арасында жүргізілген анонимді сауалнамада мұғалімнің расымен де балаларға дауыс көтеріп, қорлап отыратыны белгілі болды. Ары қарай не істеуім қажет? Кімге барамын? Көмектесіңіздерші... Ортада менің балам зардап шегіп отыр. Мұндайды тоқтату керек» деп жанайқайын жеткізді оқушының анасы.
Қалалық денсаулық сақтау басқармасындағылар жедел жәрдеммен ауруханаға келіп түскен оқушыға алғашқы көмек көрсетілген соң үйіне жіберілді деді. Оған «Вегетативті жүйке жүйесінің бұзылуы» диагнозы қойылды деп отыр.
Мектеп директоры Әбілдаева Гүлназ болған жайтты былай деп айтып берді.
«Қазақ тілі пәнінің мұғалімі оқушыға бар болғаны «үй тапсырмасын неге орындамадың?» деген. Кейін бала тағы екі сабаққа қатысты. Кейін өзін нашар сезініп медпунктке барған. Біз оның ата-анасына хабар бермек болғанымызда ол үйіндегілерге өзі хабарласып қойғанын айтқан. Кейіннен бала асханада болған. Ол аралықта оқушының ата-анасы білім бөліміне «баланың жүрегі тоқтап қалды» деп хабарласқан. Мектепке жедел жәрдем қызметі мен полицейлер келді. Баланы ауруханаға алып кетті. Менің естуімше, онда "пневмония" немесе "бронхит" диагнозы қойылыпты. Бірақ нақтысын әлі білмеймін. Біз нақты диагнозын білу үшін ресми хат жолдадық, жауабын күтіп отырмыз»,-деді мектеп директоры.
Мектеп басшысы әлеуметтік желідегі «өзін жайсыз сезінген бала екі сағат асханада есінен танып, ешкім көмекке келмеген» деген мәліметті жоққа шығарды. Айтуынша, қазіргі таңда оқушының анасы мұғалімнің жұмыстан кетуін талап етіп отыр екен. Бірақ, директор мұнымен келіспейді.
«Мұғалім 20 жылдық өтілі бар, білікті маман. Бұған дейін оның үстінен ешбір шағым түспеген. Бұл жағдайдан соң оқытушы түсініктеме жазды. «Неге үй тапсырмасын орындамадың?» деп айтқанын да көрсетті. Шыққан шудан соң оған қатаң сөгіс берілді, енді оқытушы ол сыныпқа сабақ бермейді. Бірақ оны жұмыстан шығаруға негіз жоқ деп ойлаймын. Мұғалім баладан үй тапсырмасын сұрауға құқылы. Біз де өз құқымызды қорғауға қақылымыз»,-деген директор анасының «оқытушы кешірім сұрамады» дегенін жоққа шығарды.
Айтпақшы, желідегі жазбаларға сенсек, бала үлгілі оқушы және спортпен тұрақты түрде шұғылданады.
