14 қазан, 15:52
Шымкент қалалық ішкі саясат және жастар істері жөніндегі басқармасы ұйымдастырған «Мың жүйрік» республикалық байқауының жеңімпаздарын марапаттау рәсімі өтті. Онлайн түрде өткен байқауға этнос өкілдерінің мемлекеттік тілді еркін меңгерген балалары қатысты.
Республиканың барлық өңірлерінен 5-12 жас аралығындағы 531 бала өтініш беріп, олар 4 бағыт бойынша бақ сынады. Атап айтқанда байқау «Ертегі әлеміне саяхат», «Тұлғалар тағылымы», «Мен ұнататын мамандық» және «Туған өлкеге тағзым» тақырыптары бойынша өтті. Қазылар алқасы балалардың жұмыстарын қарап шығып, үздік 10 оқушыны жеңімпаз деп таныған.
«Мың жүйрік» республикалық байқауын осымен екінші рет ұйымдастырып отырмыз. Бұл байқаудың мақсаты Мемлекет басшысының қазақ тілін ұлтаралық қатынас тілі ретінде ілгерілету жөніндегі тапсырмасымен үндесіп, үйлесіп жатыр. Мемлекеттік тілді білу – баршаға міндет. Тілдің маңызын арттырып қана қоймай, оны өскелең ұрпақтың бойына дарытуға әрқайсымыз атсалысуымыз керек. Бұл – ортақ міндетіміз. Бала жастан тілді үйретудің де маңызы жоғары, - деді Шымкент қалалық ішкі саясат және жастар істері жөніндегі басқармасының басшысы Мұратжан Шотанов.
М.Шотанов республиканың әртүрлі өңірлерінен келген байқау жеңімпаздарын марапаттап, оларға арнайы сертификаттар мен бағалы сыйлықтар тапсырды.
Марапаттау рәсімінде қазылар алқасының мүшесі Зәуре Оралбаева мен Шымкент қаласы ҚХА төрағасының орынбасары Икрамжан Хашимжанов сөз сөйлеп, жеңімпаз атанған оқушыларды құттықтады.
Естеріңізге сала кетейік, Қазақстанда 2022 жыл балалар жылы болып жарияланды. Бұл туралы жаңа жылдық үндеуде Республика Президенті Қасымжомарт Тоқаев мәлімдеді.
Мемлекет басшысы балаларға ерекше көңіл бөлу керектігін атап өтті. Олардың әл – ауқаты-Қазақстанның табысты болашағының сенімді кепілі, деп атап өтті Тоқаев.
"Бұл ұрандар мен мерекелік іс-шаралар туралы емес, балаларды қорғау мақсатында Денсаулық сақтау, білім беру, әлеуметтік қамсыздандыру саласындағы билік органдарының нақты шаралары туралы. Өскелең ұрпақтың үйлесімді дамуы мен бақытты балалық шағы – біздің жалпыұлттық міндетіміз", - деді президент.
Айта кетейік, үшінші мегаполисте балаларды дамытуға, қорғауға және қолдауға бағытталған түрлі іс-шаралар, акциялар, форумдар тұрақты негізде өткізіледі. Мектептерде тегін үйірмелер мен спорт секциялары жұмыс істейді.
Фото: Серік ҚОСАЕВ.
