Үшінші мегаполисте «Қызғалдақ жолы» халықаралық фестивалі өтті. Арбат демалыс аймағы қаланың символы болған қызғалдақпен көмкерілді. Фестивальді ресми түрде қала әкімі Ғабидолла Әбдірахымов ашты.
Арбат демалыс аймағы гүлмен көмкеріліп, түрлі көрмелер ұйымдастырылды. Қолөнер бұйымдары саудаланып, балғындар түрлі тақырыптарға суреттер салды.
Шымкент қаласының әкімі Ғ.Әбдірахымов мегаполис тұрғындары мен қонақтарын құттықтады.
– Қызғалдақ фестивалі қаламызда халықаралық деңгейде тұңғыш рет ұйымдастырылып отыр. Қызғалдақтың отаны – еліміздің Оңтүстігі екенін мақтаныш етеміз. Сондықтан, осынау әсем гүлді брендімізге айналдырып, әлем қызғалдақ арқылы Шымқаланы танып-білсе деген мақсатпен фестивальді ұйымдастырдық, - деді қала әкімі.
Фестиваль аясында шеберлер қаласы ұйымдастырылды. Ерекше қалада балалар өздері қызығып жүрген өрт сөндіруші, полиция, дәрігерлер секілді маман иелерімен жүздесіп, жұмыстарымен танысты.
Фестиваль кешке дейін жалғасып, соңы эстрада жұлдыздардың концерттік бағдарламасына ұласты.
