Шымкент әкімі Абай ауданы халқымен кезекті кездесуін өткізді. Жиында аудан басшысы Бұхарбай Парманов ауданның инженерлік-инфрақұрылыммен қамтылу барысы туралы баяндады.
Ауданды табиғи газбен қамту көрсеткіші биыл 91 пайызға жетеді. Осы мақсатта «Көкбұлақ», «Батыс», «Арғымақ», «Ақжар», «Ақтас», «Ақтас-2», «Нұршуақ» елдімекендерінде құрылыс жұмыстар басталған, жыл соңына дейін аяқталады. Ал «Нұршуақ» тұрғын алабындағы жұмыстар келесі жылға өтпелі екен. Бұл туралы қалалық әкімдіктің баспасөз қызметі хабарлады.
27 мың халқы бар «Самал-3» және 6300 тұрғын тұратын «Солтүстік-Батыс» шағынаудандары осы жылы кәріз жүйесімен қамтылады. Қамтылу көрсеткіші 41,4 пайызға жетеді.
Сонымен қатар бүгінгі таңда Абай ауданында 56,5 шақырымды құрайтын 39 көшеде жол жөндеу жұмыстары жүргізіліп жатыр.
Жоспар бойынша жыл соңына дейін Абай ауданы 100 пайыз ауыз сумен қамтылады. Бұл мақсатта «Құрсай» (Арғымақ) шағын ауданында құрылыс жұмыстары жүргізіліп жатыр. Ал «Нұршуақ», «Батыс», «Жаңаталап» елдімекендерінде құрылыс жұмыстары осы жылы ақталып, электр желісімен қамтылу көрсеткіші де 100 пайызға жетеді деп күтілуде.
Шымкент қаласының Абай ауданында халықты таза ауыз сумен қамтамасыз етуге жұмсалатын қаражат көлемі бес жыл ішінде 18 есеге ұлғайды. Сонымен қатар, қалалық бюджеттен Абай ауданының аумағын сапалы электрмен жабдықтауға 2017 жылмен салыстырғанда алты есе, газдандыруға — 50 есе, абаттандыруға – 9,5 есе көп қаражат жұмсалды.
Бұл жергілікті билік шалғайдағы тұрғын аудандар мен шағын аудандардың мәселелерін шешуге көп көңіл бөлетінін көрсетеді.
Бұл туралы Шымкент қаласының әкімі Мұрат Әйтенов Абай ауданының тұрғындарымен кездесу барысында мәлімдеді.
Қала басшысының айтуынша, биыл 320 мың халқы бар ауданда тұрғындарды таза ауыз сумен және сапалы электр энергиясымен қамтамасыз ету мәселесі 100 пайызға шешілетін болады.
"Шымкенттің республикалық маңызы бар басқа қалалардан айырмашылығы оның аумағында 81 шағын аудан және тұрғын алабы бар. Олардың 41-і ауылдық елді мекендер болды, содан кейін олар қала аумағына қосылды. Біз осы елді мекендерді толық инфрақұрылыммен, инженерлік-коммуникациялық желілермен және әлеуметтік объектілермен қамтамасыз ету бойынша кезең-кезеңмен жұмыс жүргіземіз. Мәселен, Абай ауданының 34 елді мекенінің 10-2 2020 жылға дейін орталықтандырылған ауыз су жүйесі болмаған. Соңғы екі жылда олардың тоғызында сапалы ауыз су пайда болды. Биыл аудан 100 пайыз ауыз сумен қамтамасыз етіледі", - деді Мұрат Әйтенов.
Сонымен қатар, кездесу барысында белгілі болғандай, Нұршуақ, Батыс, Жаңаталап елді мекендеріндегі құрылыс жұмыстары жыл соңына дейін аяқталып, Халықты 100 пайызға сапалы электр энергиясымен қамтамасыз етеді.
Естеріңізге сала кетейік, Шымкент қаласының әкімі жыл басынан бері тұрғын үй алаптары мен шағын аудандарды аралап, халықпен 84 кездесу өткізді. Кездесулерде тұрғындардан барлығы 874 ұсыныс пен сұрақ келіп түсті, оның ішінде 374-і орындалды. 316 мәселе жыл соңына дейін шешілуі керек. 184 мәселе 2023-2025 жылдарға арналған жұмыс жоспарына енгізілген, себебі олар ұзақ мерзімді шешімді талап етеді.
