21 ақпан, 11:30
Сынып ішінде жылыту қондырғысы қосулы тұр.
Шымкенттегі №95 орта мектептің жылуы мардымсыз. Мұнда мұғалімдер де, оқушылар да сырт киіммен отырады. Ұстаздар сынып бөлмесін жылыту үшін электр тоғына жалғанған жылыту қондырғысын пайдаланады. Қыс ауасында бөлменің қалыпты температурасын тұрақты сақтау үшін мұғалімдер осындай әдіске көшкен. 2000 жылы салынған бұл мектеп Шымкентке жаңадан қосылған Жаңаталап елдімекенінде орналасқан. Мұнда қазір 800-ге жуық бала білім алады.
Мектеп директоры Айман Қамбарова білім ғимаратындағы жылу мәселесіне қатысты түсініктеме берді.
"Тиісті талаптарға сай +18 градусты сақтаймыз" деп сендірген ол мұғалімдер мен оқушылардың сабақ үстінде сырт киіммен отыратынын корпустардың бір-бірінен алшақ және әжетхананың сыртта орналасқанымен байланыстырады. Мектеп басшысы ғимараттағы мардымсыз жылуды жоққа шығарғысы келгенімен, электрлі жылыту қондырғысын пайдаланудың қауіпті екенін жасырмайды. Алайда, бұл бойынша мұғалімдермен түсіндіру жұмыстарын жүргізетініне сендірді.
Автор: Мақпал Рысбаева
