Сәтбаевта «Шапито» циркінің 18 жастағы әртісінің денесі табылды. Бойжеткен қалада гастрольде болған, деп хабарлайды Elitar.kz Kazpravda.kz-ға сілтеме жасап.
Өлім жағдайлары белгісіз. Полицейлер цирк әртісі өз-өзіне қол жұмсады деп есептейді. Алайда оны білетіндер бұл нұсқаға сенбейді. Бұл туралы олар Facebook-те жазу қалдырған.
Достарының айтуынша, қыз әрқашан салауатты өмір салтын ұстанған, спортпен шұғылданған және циркте өнер көрсетуді армандаған.
Ол балалар үйінің түлегі болатын. Эстрадалық-цирк училищесін тәмамдап, жазда Алматының «Шапито» циркімен өндірістік тәжірибеге келісім-шартқа отырған. Қайғылы оқиға кезінде цирк Сәтбаевта гастрольдік сапарда болған.
«Аталған факті бойынша Сәтбаев қаласының полиция басқармасы «Өзін-өзі өлтіруге итермелеу» қылмыстық бабы бойынша сотқа дейінгі тергеу амалдарын бастады. Тиісті сараптамалар тағайындалды, оның қорытындысы бойынша процессуалдық шешім қабылданады», - деп хабарлады Ұлытау облыстық полиция департаментінің баспасөз қызметі.
