24 қараша, 12:24
Соңғы кезде көпшіліктің бас қосып, өз есімдерінің бас әрпімен басталатын түрлі ас-ауқатты дастарханға әкелу ойыны сәнге айналды. Бұл ойынды жастар бастаса, бүгінде ол отбасылық көңіл кештерде қолданылып жүр.
Трендтке айналған ойынға қосылған Күлаш есімді әжей өз туыстарымен бірге бас қосып, жұртты риза етті. Оның видеосы әлеуметтік желілерде пайда болды.
«Менің атым – Күлаш. Мынау кәмпит, көже, компотым бар тағы» деген зейнеткер есімінің бас әрпіне ұқсас «Қ» әрпімен басталатын құрма, құрт секілді заттарды да дастарханға қояды.
Әжейден кейін ойынды Зира, Гүлзайда, Әсел, Мөлдір есімді қыз-келіншектер жалғастырады. Видео соңында жиналғандар өздері арнайы алып келген ас-ауқатты дастархан басына қойып, отырыс жалғасады.
Бейнежазбаны көрген желі қолданушылары ойынды бастап берген әжейдің деніне саулық тілеп, осындай отырыстар көптеп болса деген ниеттерін жеткізді.
«Керемет, әрқашан қазақтың дастарханы осылай жайнап тұрсын», «Күшті, әсерлі әрі көңілді отырыс. Берекелді дастархан болсын», «Тамаша», «Әжей жарайсыз. Таппайтындары жоқ. Кезінде дастарханға тағамдарды осылай шашып қойған», «Жасап көру керек екен» деп жазды желі қолданушылары.
