Түркістан қаласының бір топ тұрғыны шу шығарды. Қаланың қақ ортасында тұрып, өлместің күнін кешудеміз деген халық «амалсыздан әжетхана суын ішіп отырмыз» деп ашынды. Бұл туралы тұрғындар ELITAR.KZ тілшісіне айтып берді.
1 шағындауданның №14 көпқабатты үй тұрғындарының өкпесі қара қазандай. «Егемен ел болғалы жағдайымыз түзелмеді» деген олар пәтерден ауыз су ішу арманға айналғанын айтады. Себебі олар бұған дейін ауыз суды ауладан тасып ішіп келген. Бар қажетін сырттағы әжетханадан өтеп келгені тағы бар. Тек былтыр ғана әр қабатқа бір дәретхана қойылған. Ауыз су құбыры да дәлізде. Пәтерге жетпей тоқтаған.
"Су жетіспейді. Бірінші, екінші қабат алғанда бізге ақпай қалады. Күтесің. Кешке ел жатқанда ғана аласың",-деді тұрғын Жеңіс Жонаев.
53 жастағы Баян Қожабекованың отбасындағы алты адам қуықтай пәтерді паналап отыр. Науқас бауыры бар. Шеттей адаммен суы жоқ пәтерде тұру азапқа айналыпты.
"Қанша үй бар осы жерде. Соның бәріне бір әжетхана. Кіргізіп берген әжетханасы, міне. Толып қалады. Өзіміз екі-үш күндеп жүріп тазалатамыз... Әжетхананың жанынан кім ауыз су ішеді? Айтыңдаршы осыны... Мақұл, оған өкпе жоқ әжетханаға. Әр үйге тартып-тартып кіргізіп берсе болады ғой суды... Амалымыз жоқ. Кімге барамыз? Кімге айтамыз? Әжептеуір кафельді ойып-ойып тастады. Үйге адам шақыруға ұяламыз" деп ашынды ол.
Үйді жөндеу жұмыстары басталғанда қуанған жұрт көп ұзамай бәз-баяғы күйге түскен. Өйткені бар жұмыс аяқсыз қалған. Енді міне, ашынған жұрт өмірімізге қауіп төніп тұр деп дабыл қақты.
"Менің көршім құлағына қан кетіп, "больницаға" алып кетті. Кеш батқанда ойнап жатып құлап түскен. Ертеңіне азанда әкеп қойып кетті есікті. Төрт баланың әкесі де құлап, аяғы сынды...",-деді тұрғындар.
Мәселемізден жауаптылар хабардар, келіп көріп кеткендері де қаншама. Бірақ нәтиже жоқ деді шу шығарған халық.
"Пожарный" келіп түсіріп кеткен. Өткенде келіп, төбесі жабылмай жатқанда келді, онда да айтқанбыз. Нәтиже жоқ... Мысалыға, мына қыз ұстап қалса, кетті токқа түсіп... Енді адам өлімі болған жағдайда ғана істеліне ме? Айтарымыз осы. Жинақтап істеп берсе, ақшасын төлейік... Жүз адам келді, қатырамын деп кетеді. Міне, қатырып жатыр. Әшейін көреді, кетеді... Шашым күйіп қалды ток ұрып..." деп ашынды халық.
70-ке жуық отбасы сәт сайын әжетхана кезегіне таласады. Тіпті көршілер өзара ренжісіп те қалады екен. Сондықтан кейбірі ауладағы әжетханаға баруға мәжбүр. Оның өзі қорқынышты деп отыр.
Ал жауаптылар болса жөндеу жұмыстары әне-міне дегенше толығымен аяқталады дейді. Түркістан қалалық тұрғын үй инспекциясы бөлімінің бас маманы Әбілқайыр Қадыров бұл тұрғын үйде кафель төсеу мен электр сымдарын реттеу жұмыстары о баста жобалық-сметалық құжатта көрсетілмеген деп кесіп айтты. Дегенмен мердігер компания жомарттық танытып өз қаржысына жасап беруге уәде етіпті. Ал әр үйге ауыз су жүргізіп, әжетхана орнату мәселесін шешуге пәтерлердің тарлығы кесірін тигізіп отыр екен.
