Баспаналы болған Волокитиндер отбасы Шардара ауданындағы Қоссейіт ауылында тұрады, деп хабарлайды Elitar.kz.
Анастасия жолдасы Андрей екеуі 9 ұл-қыз тәрбиелеп отыр. Отағасы тұрмыстық техника жөндеп, отбасын асырап келген. Алайда тапқан табыс күнделікті ас-ауқаттан артылмаған. Сол себептен шеттей балалы отбасы жалдамалы пәтерден-пәтерге көшіп жүрген. Ауылдағы "Сырдария" мектебін осыдан 20 жыл бұрын бітірген түлектер сыныптасы Анастасияға тосын сый жасауды ұйғарыпты.
Ауыл ішінен жер телімін алып, асарлатып баспана салуға кіріседі. Аз ғана уақыттың ішінде баспананы тұрғызған түлектер отбасыға кілт табыстар кезде ас беру шарасын да өз мойындарына алған. Көпбалалы отбасының қуанышын бөлісуге тек сыныптастары мен туыстары емес, аудан әкімдігінің де қызметкерлері келді. Яғни, аудан әкімінің орынбасары Бауыржан Шомпиев баспаналы болған отбасыны қуаныштарымен құттықтап, жаңа қонысқа көшкен оларға кілем сыйға тарту етті.
