Бүгін Түркістан қаласында Наурыз мерекесі аталып өтті. Салтанатты шара алдымен театрландырылған қойылымнан бастау алды.
Онда өңір басшысы Өмірзақ Шөкеев жұртшылықты мерекемен құттықтады.
«Түркістан облысында Наурыз мерекесі 14 наурыздан басталды. Облысымызда әр күнге әртүрлі ат беріліп, мағыналы әрі мазмұнды іс-шаралар, жалпыхалықтық серуендер өтті. Көшеттер отырғызылып, қаланы көркейту жұмыстары жанданды. Ұлттық киім мен дәстүрлі ән-күйлеріміз насихатталды. Бүгінгі мерекені пайдалана отырып, баршаңызды Түркістанды гүлдендіруге үлес қосуға шақырамын. «Ынтымақ жүрген жерде, ырыс бірге жүреді» деген мақал бар. Бірлігіміз мықты, еліміз тыныш болса, Түркістанымыздың келешегі жарқын болатыны сөзсіз. Баршаңызды Ұлыстың Ұлы күні – Наурыз мерекесімен шын жүректен құттықтаймын», – деді Өмірзақ Шөкеев.
Мерекелік шара кейін Арбаттағы серуенге ұласты. Онда қала қонақтары мен тұрғындар көрмені тамашалады.
Кейінірек мейрамды тойлаушылар этноауылға жиналды. Онда 20-ға жуық киіз үй тігіліп, дастархан жайылды.
Бұл күні 2000 литр наурыз көже мен 1,5 тонна палау арнайы әзірленіп, тұрғындарға таратылды.
Айтпақшы, Түркістанда облыс орталығы болып белгіленгелі бері тұңғыш рет Ұлыстың ұлы күні аталып өтті.
