Түркістан облысы кәмелетке толмағандар ісі жөніндегі мамандандырылған ауданаралық соты Түркістандағы Талғат Бигелдинов атындағы мектептің 9-сыныптағы үш оқушысына "әлімжеттік жасаған" қаладағы өзге үш мектептің төрт оқушысын кешірді. Бұл туралы облыстық соттың баспасөз қызметі хабарлады.
Баспасөз қызметінің мәлімдеуінше, Қылмыстық кодекстің "бұзақылық" бабымен айыпталған төрт оқушы жәбірленушілермен татуласып, айыпталушы тарап келтірілген шығынды өтеген. Екі жақтың келісімге келген соң 21 мамырда қылмыстық іс тоқтатылған. Айыпталушылар мен жәбірленушілер кәмелет жасқа толмағандықтан, олардың аты-жөні жарияланбады.
Айта кетейік, 21 қаңтарда ғаламтор желілерінде түркістандық мектеп оқушыларының үш балаға әлімжеттік жасап, оларды ұрып-соғып, "темекімен күйдіреміз" деп қорқытып жатқаны бейнеленген видео тараған. Артынша ішкі істер министрлігінің өкілі төбелеске қатысушылардың жеке бастары анықталғанын хабарлаған болатын. Сәл кейінірек өзінен төменгі сыныпта оқитын балаларды ұрып-соққан оқушылардың бірінің анасы күллі қазақстандықтардан ұлының әрекеті үшін кешірім сұрады.
