Түркістан облысында Төлеби ауданы әкімінің орынбасарын атып кеткендер сот залынан босатылды. Қылмыстық іске қатысы бар деген төрт азаматқа сот рақымшылық танытты. Сот шешімі бойынша қылмыстық іске қатысы бар Амалбаевқа 1 жыл, қалған үшеуіне 1 жыл, 6 ай бас бостандығынан айыру емес, шектеу жазасы тағайындалды. Енді олар жазаны тұрғылықты мекенжай бойынша өтейтін болады.
Аты шулы істі қараған Төлеби аудандық сотының төрағасы мұндай шешімнің шығуына жәбірленуші тараптың кешірім беруі мен айыпталушылардың жастығы ескерілген дейді.
Қылмыстық іс әуелі «адам өлтіруге оқталды» деген баппен қозғалған. Кейін ол қайта өзгеріп, сотқа дейінгі тергеу жұмыстары қару-жарақты заңсыз иемдену немесе алып жүру бабы бойынша қайта жалғасты. Тергеу мәліметтеріне көз салсақ, күдіктілер Рабиға Бейсебаеваға тапа тал түсте бас салған. Ақырында әкім орынбасары басынан жарақат алып, ауруханаға түскен. Күдіктілердің адвокаттарының айтуынша, Рабиға Бейсебаева ұсталғандардың бірінің шешесіне қомақты ақша берешек болыпты.
