Облыс бойынша жол апатының санын азайтуды көздеген Түркістандық сақшылар «Жүргізушіге хат» акциясын өткізуде, деп хабарлайды Elitar.kz.
Жылдамдықты
асырып, жол белгілеріне назар аудармайтын,
қарсы бетке шығып немесе мас халде көлік
тізгіндеп, апатқа себепші
болған жүргізушілерге жасөспірімдер арнайы хат жазды. Мақсат - оқушылардың тілегі арқылы
жүргізушілерге ой салу.
Мәселен, сәуір айының соңында Арыс ауданында полиция бөлімінің ұйымдастыруымен мектеп оқушыларының арасында «Жүргізушіге хат» акциясы өтті. Шығармашылық акцияда оқушылар жүрек түкпіріндегі тілектерін, орамды ойларын, ұсыныстарын қағазға түсірді. Полиция қызметкерлері мен мектеп мұғалімдерінен арнайы комиссия құрылып, шығарма жазған оқушылардың жазбалары талданып, сараланып, ішінен оза шыққандарына арнайы алғыс хаттар табысталды.
Арыс қаласы №1 Е.Молдабаев атындағы жалпы орта мектебінің 7 «а» сынып оқушыларының жазған хаттары арасында Әбдімүтәліп Дариға мен Жаннұр Тұңғышбектің жазбасы ерекше деп танылды.
Жаннұр Тұңғышбек өзінің жазған шығармасында «Кейбір жүргізушілер бір-біріне жол бермейді. Көлікті бар жылдамдықпен айдап, жол апатын жасайды. Бағдаршамды да елемей өтіп кете береді...» деп жазса, екінші оқушы Дариға Әбдімүтәліп «Ішімдікке сылқия тойып, жиыннан шыққанда көлік басқаратын жүргізушілер мен жылдамдықты асыратын жүргізушілердің апатынан адамдар қаза болып, балалары жетім қалады» деп өздерінің ойларын ашық және айқын жеткізді.
Акция өзге де аудандарда өткізілетін болады.
