28 наурыз, 10:51
Шардарада жүкті әйелдер өз қалауы бойынша арқанның көмегімен босана алады.
Толғақ кезінде әйелдер арқанды мықтап ұстаса, сәбиді босануы жеңілдей түседі, дейді дәрігерлер. Байырғы да жаңа әдісті Шардара аудандық орталық ауруханасының бас дәрігері Жанар Оспанова енгізген.
– Медициналық тұрғыдан алғанда бұл пайдалы әдіс саналады. Толғақ кезінде күштің бәрі арқанды ұстауға кетіп, әйел жеңіл босана бастайды. Тік тұрып босану әдісінің физиологиялық босануды енгізу барысында ана мен нәресте үшін пайдалы жақтары бар, босану барысында шақалақ басының өз салмағымен босану жолдарымен жүруі жеңілдеп, тиімділігі арта түседі. Әрине, кез келген әдістің өзіндік ерекшеліктері мен қарсы көрсеткіштері бар, - дейді Шардара аудандық орталық ауруханасының бас дәрігері Жанар Оспанова.
Жергілікті дәрігерлердің айтуынша, олар шетелдіктердің босанудың осы әдісін патенттеп алғысы келетіндерін естіген. Дегенмен, орталық аурухананың бас дәрігері мұндай әдісті шетелдіктерден бұрын өздері патенттеп алатындарына сендіріп отыр. Әзірге мұндай әдіс тек Шардара аудандық орталық ауруханада ғана қолданылуда. Мұнда арқанның көмегімен 300-ден аса ана сәбиін босанып алды. Аурухана жетекшілері алдағы уақытта суда босандыру әдісін де қолданысқа енгізуді жоспарлап отыр.
Автор:
Elitar.kz
