26 ақпан, 11:58
Қолға түскенге дейін ол бүлінген көлігін біршама жөндеп үлгерген.
Жол апатына ұшыраған көлікті құқық қорғаушыларға хабар бермей жөндемек болған шебердің де мәселесі қаралады.
Жол апаты облыстағы Қарасай ауданында 15 ақпан күні болды. Жаңатұрмыс-Ұзынағаш тасжолында белгісіз көлік 27 жастағы жігітті қағып кеткен. Жәбірленуші арада бірнеше сағат өткен соң ауруханада есін жимаған күйі қаза тапты.
«Оқиға орнынан көліктің жарықшамының ұсақ сынықтары мен бояуының бөлшектері табылды. Сол бойынша «Тойота Эстима» автокөлігін анықтаудың сәті түсті. Көлік жүргізушісін анықтау үшін шұғыл-іздестіру шаралары жүргізіліп, осындай көліктің барлығы тексерілді. Нәтижесінде Жаңатұрмыс ауылының 20 жастағы тұрғыны ұсталды. Ол көлігімен адам қағып, оқиға орнынан қашып кеткен. Қазір бұл факті Қарасай аудандық полиция бөлімінде тексерілуде» - деп хабарлады Алматы облыстық ПД баспасөз қызметі.
Тәртіп сақшылары, сонымен қоса, қолға түскенге дейін жүргізушінің бүлінген көлігін жергілікті шеберге жөндетіп үлгергенін хабарлады. «Сотқа дейінгі тексеру барысында жол-көлік оқиғасына апатына ұшыраған көлікті құқық қорғаушыларға хабар бермей жөндемек болған шебердің де мәселесі қаралады», - деп қосты полицияның баспасөз қызметі.
Автор:
Elitar.kz
