Астанада Онкология орталығының 70 жылдығына орай ғылыми-тәжірибелік конференция өтті. Үш күнге созылған іс-шараға 500-ден астам отандық және шетелдік сарапшы дәрігерлер қатысты, деп хабарлайды елорда әкімдігінің ресми сайты.
Онкология орталығының 70 жылдығы - бұл жай күн емес, бұл тарихи сәт: миллиондаған өмір, емделіп шыққан науқастар қуанышы, бірегей оталар! Айтулы күнге орай ұйымдастырылған ғылыми-тәжірибелік конференцияға 500-ден астам отандық және шетелдік дәрігерлер, ғалымдар мен сарапшылар, оның ішінде онкология саласындағы әлемге әйгілі 47 спикер қатысты.
«Халық денсаулығы - өмір сапасының көрсеткіші. Президент Қасым-Жомарт Тоқаев атап өткендей, «еліміздің басты құндылығы - адам. Ұлт саулығы жақсы болса ғана, қоғам орнықты дамиды». Осы жерде жиналған бәрімізді біріктіретін ең үлкен құндылық - адам денсаулығы мен өмірі. Медицина ғылымының үнемі жаңарып отыратын деректер дәуірінде әрбір дәрігер өзінің білімі мен дағдыларын үздіксіз жетілдіруі керек», - деді Қоғамдық денсаулық сақтау басқармасы басшысының орынбасары Берік Қайкенов.
Конференция аясында Үндістан, АҚШ, Ресей елдерінен келген жетекші мамандардың қатысуымен колоректальды қатерлі ісікке лапароскопиялық хирургия, кеуде хирургиясы бойынша үш мастер-класс, бас және мойын ісіктеріне, сүт бездеріне сәулелік терапия бойынша екі мастер-класс өтті.
