Астана қаласында «Отбасы – бақыт мекені» жобасы аясында «Үздік жас отбасы» байқауына өтінімдерді қабылдау басталды.
Конкурсқа 29 жасқа толмаған ерлі-зайыптылар (ерлі-зайыптылардың бірі 29 жасқа толмаған болуы керек) қатыса алады, деп хабарлайды елорда әкімдігінің ресми сайты.
Байқаудың мақсаты – жас отбасылар арасында мәдениет, салт-дәстүр мен адамгершілік құндылықтар негізінде неке және отбасы институтын нығайту.
Конкурстың басты міндеттері ретінде дәстүрлі отбасылық құндылықтарды және отбасына деген жауапкершілікпен қарауды насихаттау; жастар арасында ұлттық, мәдени дәстүрлер мен отбасылық әулеттерге құрмет; жас отбасылардың өмір сүру сапасын арттыру; салауатты отбасылық демалысты ұйымдастыру; отбасылардың шығармашылық әлеуетін ашуға жәрдемдесу; жас отбасыларға қолайлы көңіл күй сыйлау; мәдени мұраны және қоғамның үздік дәстүрлерін сақтау көрсетілген.
Өтініш беру үшін ұйымдастырушыларға тиісті құжаттар мен «Неліктен біз бұл сайыста жеңіске жетуіміз керек» тақырыбына бейнеролик түсіріп жіберулері керек.
Жеңімпаз 500 мың теңге алады, екінші орын үшін жүлде 350 мың теңгені, үшінші орын – 250 мың теңгені құрайды.
