Шымкентте бензовоз көлігі аударылып кетті

17 ақпан, 15:08

Оқиға 17 ақпан күні сағат 12: 28-де Қаратау ауданы, Бәйдібек би көшесі бойындағы Бозарық тұрғын алабындағы айналма жолда орын алды, деп хабарлайды қалалық Төтенше жағдайлар департаментінің баспасөз қызметіне сілтеме жасап Elitar.kz.

Алдын ала мәліметтер бойынша жүргізуші рөлді басқара алмай, жалпы сыйымдылығы 23 тонна "Камаз" (бензин тасушы) автокөлігі бір жаққа аударылып, АИ-95 маркалы бензиннің ағуына алып келді.

Оқиға орнында өрт орын алмады, ешкім зардап шеккен жоқ. Төгілген мұнай өнімдеріне қауіпсіздікті сақтау мақсатында өрт сөндірушілер "Пурга-5" маркалы көбік оқпанын беруді ұйымдастырды. Төгілген жанар-жағар май көлемі нақтылануда.

Оқиға орнына Шымкент қаласы ТЖД Өрт сөндіру және авариялық-құтқару жұмыстары қызметінің жеке құрамынан 26 адам, 5 бірлік арнайы техника, "Апаттар медицинасы орталығы" филиалының 3 қызметкері және Шымкент қаласы полиция департаментінің мамандары тартылды.