20 қараша, 08:47
Шымкенттегі №142 сайлау учаскесінде 88 жастағы тыл ардагері Өркен Әбдіреев алғашқылардың бірі болып дауыс беруге келді.
Елінің ертеңі үшін алаңдаған ардагерге комиссия мүшелері арнайы сыйлық табыстады.
Айта кетейік, бүгінде еліміздің үшінші мегаполисінде қоғамдық көлік барлық жолаушыларға тегін қызмет көрсетеді.
"Бүгін 20 қараша Қазақстан Республикасы Президентінің сайлауы. Таңғы сағат 7:00-ден бастап 18 жасқа толған елдің әрбір азаматы өз таңдауын жасайды. Осы тарихи күні Шымкент қаласының сайлаушыларына қолайлы жағдай жасау үшін тегін қоғамдық көлік ұсынылады",-деп атап өтті қала әкімдігінің баспасөз қызметі.
Қалалық автобустар таңғы сағат 7:00-ден кешкі 21: 00-ге дейін тегін қатынайды.
Айта кетейік, қазір Шымкентте 2332 тыл ардагері тұрады. Ресми мәлімет бойынша облыстық, Алматы, Шымкент және Астана қалаларының комиссия мүшелері ұсынған жедел деректерге сәйкес елорда уақытымен 8.15 те еліміз бойынша барлық 10033 сайлау учаскесі жұмысқа кірісті. Сондай-ақ, шетелдегі барлық сайлау учаскелері Қазақстанның дипломатиялық өкілдіктерінің аумақтарында ұйымдастырылған 17 сайлау учаскесі дауыс беруге кірісті.
Сайлау заңнамасына сәйкес шет мемлекеттердегі Қазақстан Республикасы өкілдіктерінің жанындағы сайлау учаскелері бойынша сайлаушылар тізімдеріне тиісті шет мемлекетте тұратын немесе ұзақ мерзімді іссапарда жүрген және Қазақстан азаматының төлқұжаты бар барлық азаматтар енгізіледі.
Нақтырақ тоқталсақ, Шетелдегі 51 учаске уақыт белдеулерінің айырмашылығын ескере отырып дауыс беруге кіріседі. Ең бірінші болып қазақстандықтар Жапония мен Кореяда дауыс беруге мүмкіндік алды. Өйткені, Токиода № 261 және Сеулде № 258 сайлау учаскелері жергілікті уақыт бойынша сағат 07.00-де дауыс беру үшін бірінші болып ашылды.
