Бұл туралы Түркістан облысы ПД-нің баспасөз қызметіне сілтеме жасай отырып Elitar.kz хабарлайды.
Жуырда Ордабасы аудандық полиция бөліміне сол ауданның жергілікті тұрғыны, баласы үйінен белгісіз бағытқа шығып кеткенін айтып, арызданған.
Аталған арыз АПБ-не тіркеуге алынды. Ордабасы АПБ-нің жедел уәкілі, полиция аға лейтенанты Саят Шекербеков бірден ауылдасын іздеуге кіріседі. Полицей жігітті үйінен шыққан сәтінен бастап сол жолды тексеру арқылы барлық көрген-білген адамдардан сұрастыра бастайды.
Бірқатар куәгерлер «ол жігіт жолда кетіп бара жатқан десе, енді біреуі көлікке отырғанын көрдік» деп түрлі жауаптарын айтады. Алайда, Саяттың сол күнгі іс-әрекеті нәтиже бермейді. Іздестірудің екінші күнінде арнайы полиция қызметкерлерінен құрылған мобильдік топ шақырылады. Олар да ауыл ішін, сонан соң сыртқы территориясын тінтуді жалғастырады. Ал, өз түйсігіне сеніп ауыл шетіндегі қырларға дейін тексеру жүргізген Саят ақыры жоғалған 29 жастағы жергілікті тұрғынды қырдан тапты.
Полицейдің сөзіне сенсек,
жоғалған жігіт үйіне бара жатырмын
деген оймен қырдан қырға қарай адасып
кете берген. Осылайша қырағы полицей
ізім-ғайым жоғалған жігітті ата-анасына
дін аман табыстады. Бүгінгі таңда
жігіттің денсаулығына ешқандай шағым
жоқ. Баласымен қайта қауышқан ата-ана
да қырағы полицейге дән риза.
