Қызды еркінен тыс зорлықпен алып қашқаны үшін қызылордалық үш жігіт 7 жыл шартты мерзім алды, деп хабарлайды Қызылорда сотының баспасөз қызметіне сілтеме жасай отырып Elitar.kz.
Оқиға өткен жылдың шілде айында болған. Үйленбек болған жігіт екі ауылдасынан қыз алып қашуға көмектесуін сұрайды. Үшеуі Қызылордаға келіп, қыздың жұмысқа баратын жолын аңдиды. Қызды кездестірген соң машинаға отыруын өтінеді. Қарсылық танытқан қызды олар машинаға күштеп отырғызады. Ауылға қарай үлкен жылдамдықпен келе жатқан көлікті полицейлер тоқтатқан кезде, қыз олардан көмек сұрауға мүмкіндік алған. Полиция оларды мекемеге алып кеткен. Нәтижесінде қыз ұрлағаны үшін үш жігіт 7 жылға шартты мерзімге сотталып кетті.
