Жамбыл облысы Т.Рысқұлов ауданының 57 жастағы тұрғыны алаяқтың құрбаны болды. Полицияға арызданған әйел белгісіз адам банк қосымшасы арқылы оның атына 750 мың теңге көлемінде несие рәсімдеп алғанын айтқан. Жәбірленушінің несиеден мүлдем хабары болмаған. Ол осы уақытқа дейін тек 100 мың теңге көлемінде рәсімдеген несиесін ай сайын төлеп жүрген. Тек банк қызметкері хабарласып, төленбеген несиесі бар екенін ескерткен кезде бір-ақ біліпті.
«Жедел-іздестіру жұмыстарының нәтижесінде алаяқтыққа қатысы бар Т.Рысқұлов ауданының 23 жастағы тұрғыны анықталып, полиция бөліміне жеткізілді. Күдікті кінәсін толық мойындады. Ол жәбірленушінің келiнi болып шықты» деп атап өтті облыстық Полиция департаментіндегілер.
