Бүгін Мәжілістің Қаржы және бюджет комитетінің отырысы өтіп, онда Премьер-министрдің бірінші орынбасары - Қаржы министрі лауазымына тағайындау үшін Әлихан Смайыловтың кандидатурасы келісілді. Бұл туралы Мәжілістің сайтына сілтеме жасап Elitar.kz хабарлайды.
Осы мәселе комитеттің отырысында "Қазақстан Республикасының Парламенті және оның депутаттарының мәртебесі туралы" Қазақстан Республикасы Конституциялық Заңының 22-1-бабына сәйкес қаралды.
Қазақстан Премьер-министрінің тапсырмасы бойынша кандидатураны Премьер-министр Кеңсесінің басшысы Нұрлан Алдабергенов таныстырды. Кеңсе басшысы Әлихан Смайыловтың қаржы саласында үлкен жұмыс тәжірибесі бар және қажетті басқару құзыреттеріне ие екенін атап өтті.
Мәжіліс Комитетінің мүшелері Ә. Смайыловқа бірқатар сұрақтар қойып, талқылаудан кейін тиісті қорытынды қабылдады.
"Қазақстан Республикасы Парламенті Мәжілісінің Қаржы және бюджет комитеті "Қазақстан Республикасының Парламенті және оның депутаттарының мәртебесі туралы" Қазақстан Республикасы Конституциялық Заңының 22-1-бабына сәйкес, Қазақстан Республикасының Премьер-министрі ұсынған Әлихан Асханұлы Смайыловтың кандидатурасын қарап, аталған кандидатураны Қазақстан Республикасы Премьер-министрінің бірінші орынбасары-ҚР Қаржы министрі лауазымына тағайындау үшін ұсыну мүмкін деп санайды" делінген мәжілістің сайтындағы ақпаратта.
Отырыс соңында депутаттар кандидатқа алдағы жұмыс барысында табыс тіледі.
