Елбасы Нұрсұлтан Назарбаев бұрынғы Үкімет басшысы Бақытжан Сағынтаевты адал әрі тәжірибелі азамат екенін атап өтті, деп хабарлайды Ақорданың ресми сайтынан сілтеме жасап Elitar.kz.
Қазақстан Президенті Парламент Мәжілісінің депутаттарына арналған сөзінде бұрынғы Үкіметтің жаһандық дамудың күрделі жағдайына қарамастан экономиканың өсімін сақтауға күш салғанын атап өтіп, Үкімет мүшелеріне атқарған жұмысы үшін ризашылық білдірді.
– Премьер-министр Бақытжан Сағынтаев туралы арнайы айтқым келеді. Ол бұған дейін Павлодар облысының әкімі, экономика министрі, вице-премьер, бірінші вице-премьер лауазымдарын лайықты атқарып, өзін жақсы қырынан көрсетті. Бақытжан Сағынтаев – адал әрі тәжірибелі азамат. Ол басқа да салаларда қызмет ете алады. Бірақ, жекелеген министрліктердің, әсіресе әлеуметтік саладағы ведомстволардың жұмысындағы олқылықтар бүкіл Үкіметтің отставкаға кетуіне әкеп соқтырды, – деді Елбасы.
Нұрсұлтан Назарбаев халықаралық аренадағы тұрақсыздық пен санкциялық текетірестер еліміздің әл-ауқатын нығайту үшін тың шаралар мен шешімдер қабылдауды талап ететінін айтты.
Фото: liter.kz
