20 қараша, 08:35
Шымкенттегі №89 сайлау учаскесінде Президент сайлауы таңғы сағат 06:00-де басталды. Бұл жолы елінің қауіпсіздігі үшін ерінбей еңбек етіп, әскери қызметте жүрген Ұлттық ұланның офицерлер құрамы мен сарбаздары дауыс берді. Олар алғашұылардың бірі болып, өз таңдауларын жасады. Әскери қызметкерлерінің басым бөлігі Қазақстан Республикасының президентінің сайлауына алғаш рет қатысып отыр.
– Мен Тараз қаласында туып-өстім. Отан алдындағы борышымды өтеу үшін әскер қатарына өткен жылдың көктемінде шақырылдым. Отанымыздың болашағына бей-жай қарай алмаймын. Алдағы уақытта елге қызмет етсем деймін. Сондықтан, өз елімнің болашағы үшін өз таңдауымды жасадым. Менің ойымша, мемлекеттің саяси өміріне белсенді араласу да елге қызмет етудің бір түрі деп білемін, – деді 6506 әскери бөлімінің сарбазы Сәттібек Мейрамбек.
Учаскелік сайлау комиссиясының төрағасы Нүркеш Сартбайдың айтуынша, бүгінгі сайлаумен 6 сарбаздың туған күні қатар келіп отыр. Оларға әскери бөлім басшылығы атынан арнайы сыйлық табыс етілді.
Бұл әскери бөлімде орналасқан сайлау учаскесінде 815 сайлаушы тіркелген. Сарбаздар ала таңмен таласа дауыс беріп, өз таңдауын жасады. Мұнан соң, қала тұрғындары мен қонақтарының қоғамдық қауіпсіздігі үшін қызметтеріне кірісті.
Естеріңізге сала кетейік, бүгін үш мегаполисте 86 сайлау учаскесінде дауыс беру, таңғы алтыдан басталды. Бұл әскери бөлімдер, шалғай аудандар, шалғайдағы мал шаруашылығымен айналысатындарға арналған учаскелер, демалыс үйлері, санаторийлерде, стационарлық емдеу орталықтарында, тергеу изоляторлары мен уақытша ұстау изоляторларында, сондай-ақ Қазақстан Республикасының шет мемлекеттердегі өкілдіктері жанында құрылған сайлау учаскелері.
Сайлау учаскелерінде дауыс берудің дәстүрлі уақыты – таңғы 7:00-ден кешкі 20:00-ге дейін.
Мүмкіндігі шектеулі азаматтар үшін шымкентте 293 сайлау учаскесі қарастырылған. Ал жалпы Шымкентте барлығы 634 818 адам дауыс беруге құқылы.
Сайлау заң аясында, құқықбұзушылыұсыз өтуі үшін комиссияның барлық мүшесі арнайы оқытудан өткізілді. Нақтырақ айтар болсақ, 2700 азамат. Оның 2582-сі онлайн тестілеуден өтіп, сертификаттар алды. Сонымен қатар, учаскелік сайлау комиссияларының төрағалары үшін де арнайы семинар бар.
"Еш жерде тұрмайтын және тіркелмеген тұрғындар үшін біздің қалада 20 сайлау учаскесі ашылған. Бұл жерге тіркеусіз кез келген адам келе алады. Және өтініш жаза алады. Мұнда халыққа қызмет көрсету орталығының мамандары қызмет көрсетеді. Өтініш негізінде адамға бюллетень жазылады, бюллетень беріледі және ол өз дауысын бере алады", – дейді Шымкент қаласының сайлау комиссиясының төрағасы Қайырбек Құнанбаев.
