Шымкент қаласының әкімшілік құқық бұзушылық жөніндегі мамандандырылған ауданаралық сотында жол қозғалысы ережелерін бұзумен байланысты құқық бұзушылық істерді қарау кезіндегі туындаған мәселелерді талқылау мақсатында дөңгелек үстел мәжілісі өтті. Жиынға судьялар, прократура өкілдері, полиция қызметкерлері мен оның құрылымдық бөлімшелерінің мамандары қатысты.
Дөнгелек үстелді қалалық соттың қылмыстық істер жөніндегі сот алқасының төрағасы Бәйдібек Дүйсебеков ашып, жүргізіп отырды. Жиында әкімшілік құқық бұзушылықтар жөніндегі мамандандырылған ауданаралық сотының судьясы Серік Ниязбек құқық бұзушылықты дәлелдеу кезінде полиция қызметкерлері тарапынан жіберілген қателіктер жөнінде баяндады.
–Полиция қызметкерлері әкімшілік құқық бұзушылық туралы хаттама жасайтын кезде жауапкершілікке тартылатын адамның құқық бұзғаны туралы дәлелдемелердің жеткіліксіз болғанына жиі кезігіп жатырмыз. Мәселен, кейбір істерді қараған сәтте оқиға орнындағы бейнетүсірілімнің толық емес, қиылғаны анықталды. Мұндай жағдайлар судьяның ұйғарым шығаруына тікелей әсер етеді. Сондықтан жергілікті полиция қызметкерлері бейнетүсірілімдердің толық нұсқасын жіберсе екен дейміз. Кейінгі мәселе, жауапкершілікке тартылатын азаматтардан полиция әкімшілік хаттамаларды толтырғанда олардың құқығы туралы толық түсіндірмейтінін айтып, шағымданады. Кез келген жауапқа тартылушының адвокат пен аударма қызметін пайдалануға толық құқығы бар. Мұны полиция қызметкері жауапқа тартылушы азаматқа түсіндіруі керек, - деді судья С.Ниязбек.
Осы орайда, Б.Дүйсебеков полиция қызметкерлері қалалық адвокаттар алқасымен тығыз байланыста жұмыс істеуді алға тартты.
Шымкент қаласы ауданаралық сотына жыл басынан бері әкімшілік құқық бұзушылық туралы 11 249 іс келіп, оның ішінде 6 383 іс полиция департаментінен түскен. Полициядан келген істің 6 241-і көрсетілген санаттарға жатады. Талдау барысында ең көбі «Әкімшілік құқық бұзушылық туралы» ҚР Кодексінің 610-бабы бойынша (көлік жүргізушілерінің құқық бұзғаны) қаралғанын көрсеткен. Сонымен бірге, биыл ӘКБтК-нің 608 бабы бойынша істер (көлік құралын алкогольді, есірткі және мас күйінде басқару) санаты ұлғайған. Осы бап бойынша 2021 жылы 782 іс қаралса, биылғы жылдың 11 айында 885 қаралыпты.
Дөңгелек үстел барысында қатысушылар пікір алмасып, әкімшілік іс жүргізу кезінде туындайтын мәселелерді шешу жолдарын талқыға салды.
