Бүгін Шымкент қаласының Ақпараттық-коммуникациялық орталығында Абай ауданы Төтенше жағдайлар басқармасы бастығының орынбасары, азаматтық қорғау капитаны Эльдар Паттаховтың және басқарманың аға инженері, азаматтық қорғау аға лейтенанты Бәйдібек Әбілқасымның қатысуымен аудан аумағында жылыту маусымында және мереке күндері төтенше жағдайлардың алдын алу бойынша брифинг берді.
«Басқарманың 2022-2023 жылдарға арналған жылыту кезеңінде тұрғын үй секторындағы өрттердің алдын алу бойынша жұмыстар Шымкент қаласы әкімінің орынбасарымен бекітілген іс-шаралар жоспарына сәйкес орындалуда.
Атап айтқанда тамыз айынан бастап «Өрт қауіпсіздігі айлығы», «Жатақхана», «Улы газдан сақ болыңыз», «Әр үйге қауіпсіздік» акциялары жүргізілді.
Сонымен қатар, Шымкент қаласы әкімі орынбасарының төрағалығымен төтенше жағдайлардың алдын алу және жою жөніндегі комиссияның кезекті отырысында төтенше жағдайлардың алдын алу бойынша құзырлы мекемелерге тиісті тапсырмалар беріліп, орындалуы комиссия бақылауында»,- деді Э.Паттахов.
«Өрт қауіпсіздігі айлығы» акциясының нәтижелері бойынша құзырлы органдармен бірлесіп, халықтың әлеуметтік осал тобына жататын 652 отбасының үйіне барып, түсіндірме жұмыстары жүргізіліп, 3 452 адамға нұсқама берілді.
«Жатақхана» акциясының нәтижесінде Абай ауданында орналасқан 12 жатақаханың 1156 тұрғынына үгіт-насихат жұмыстары жүргізіліп, жадынама парақшалары таратылды.
Тұрғындардың қауіпсіздік ережелерін сақтамауының арты қайғылы жағдайларға соқтырады. Сондықтан тұрғындар халықтың газ тұтынуда жауапкершілігін күшейту мақсатында өткізілетін түсіндірме жұмысының маңызы үлкен екенін айтады.
Шымкентте оқыс оқиғалардың санын азайту үшін 2021 жылы 2192 үй газды автоматты реттеу жүйесімен қамтамасыз етілді. 2022 жылы тағы 2454 үйге орнатылды. Жалпы, жылыту маусымында әлеуметтік қорғалмаған отбасылардың үйлері мен пәтерлеріне автономды газ детекторлары орнатылды.
Шымкент қаласында 2021-2022 жылу беру маусымында 56 өрт оқиғасы тіркеліпті. Өткен жылыту маусымында (2020-2021 ж.ж.) олардың саны 61 болып еді. Шымкент қалалық Төтенше жағдайлар департаментінің басшысы Мадияр Жақсыбаев өрттің шығуының негізгі себебі қондырғыларды орнату кезінде өрт қауіпсіздігі ережелерін сақтамау екенін айтады. Сонымен қатар, электр жабдықтарын, пештер мен мұржаларды пайдалану кезінде, өрт қауіпсіздігін бұзу. Өрт оқиғалары негізінен жеке тұрғын үй секторында тіркелген.
