28 қазан, 06:29
Қазіргі таңда Қазақстандық салалық мәдениет, спорт және ақпарат қызметкерлері кәсіподағы Түркістан облыстық филиалының төрағасы болып ҚР Мәдениет қайраткері Бастарбек Пірімбетов қызмет атқаруда. Бүгін Түркістан облысы мен Шымкент қаласының аумақтық кәсіподақтар бірлестіктерінің біріккен отырысында Бастарбек Пірімбетов көрнекті мемлекет және қоғам қайраткері Асанбай Асқаровтың - 100 жылдық мерекелік төс белгісімен марапатталды.
Жиынға «Түркістан облысы кәсіподақтар орталығы» аумақтық кәсіподақтар бірлестігінің төрағасы Бердіғали Өмірәлі, «Шымкент қаласы кәсіподақтар орталығы» аумақтық кәсіподақтар бірлестігінің төрағасы Бауыржан Әлтеев, А.Асқаров қорының Президенті Ерқуат Байзақов, салалық кәсіподақтардың төрағалары мен кәсіподақ активі қатысты.
Салтанатты жиынға А.Асқаров қорының Президенті Ерқуат Байзақов арнайы келіп, жиылған қауым алдында Оңтүстік өңірінің мәдениет және өнер саласының дамуына сүбелі үлесін қосып, халық үшін аянбай еңбек етіп, білікті басшы, өрелі тұлға атанған Бастарбек Пірімбетовке «Асанбай Асқаровқа 100 жыл» мерекелік медалін кеудесіне тақты.
«Шымкент қаласы кәсіподақтар орталығы» аумақтық кәсіподақтар бірлестігінің төрағасы Бауыржан Әлтеев ел ағасын мәртебелі наградасымен құттықтап, жылы лебізін білдірді.
Көпшілік алдында сөз алған Бастарбек Пірімбетов еңбегінің еленгеніне алғыс айтып, бұл сала ұлт мақтаныштарына айналған ұлы тұлғалармен сыйлас еткендігі жайлы айтып өтті.
Айта кетейік, ғұмырын ұлтымыздың мәдениеті мен өнерін дамытуға арнаған Бастарбек Пірімбетов есімі Оңтүстік өңіріне кеңінен танымал. Ол кезінде Шымкент қалалық мәдениет бөлімінің бастығы, Ж.Шанин атындағы облыстық драма театрының директоры, Ш.Қалдаяқов атындағы облыстық филармониясының директоры, облыстық мәдениет басқармасы бастығының орынбасары сияқты лауазымды қызметтерді абыроймен атқарды. Еселі еңбегі нәтижесінде ҚР Мәдениет қайраткері, Түлкібас ауданының құрметті азаматы атанды. Бүгінгі таңда ол Қазақстандық салалық мәдениет, спорт және ақпарат қызметкерлері кәсіподағы Түркістан облыстық филиалының төрағасы қызметін атқарып жүр.
