26-27 қараша күндері Австрияның Грац қаласында эстетикалық топтық гимнастикадан Әлем чемпионаты болып өтті.
Чемпионатта Қазақстан құрамасы сапында шымкенттік «Кармелит» командасы жүлделі ІІІ орынды иеленді.
Атап айтсақ, команда құрамында Элина Кан, Саида Патшахан, Аида Жақсыбек, Сәния Тұрдыбай, Сабина Елубаева сынды спортшылар бар.
Спортшылар Әлия Юсупова басқаратын Шымкент қалалық №9 көркем гимнастика спорт мектебінің шәкірттері. Оларды жарысқа Любовь Боброва, Виолетта Керхер сынды білікті мамандар даярлады.
Айта кетейік, байрақты бәсекеге 17 елден 25 команда бақ сынады. Соның ішінде Шымкенттік көркем гимнастшылар өз біліктілігін көрсетіп, қола жүлдені қанжығасына байлады.
Естеріңізге сала кетейік, Шымкенттік спортшылар 9 айда 1629 медаль жеңіп алды.
2022 жылдың 9 айында біздің спортшыларымыз түрлі спорт түрлері бойынша жалпы 1629 медаль жеңіп алды. Оның ішінде, Қазақстан Республикасының чемпионаттарына қатысып, 491 алтын, 454 күміс, 470 қола медаль алып, Азия чемпионаттарында 59 алтын, 34 күміс және 52 қолаға қол жеткізсе, осы уақыт арасында Әлем чемпионаттарында 31 алтын, 20 күміс және 18 қола медальға ие болды. Сонымен қатар, 2022 жылғы 1-15 мамыр күндері Бразилияның Кашиас-ду-Сул қаласында өткен ХХIV Сурдлимпиада ойындарында еркін күрестен 2 орынды иеленген 70 кг. салмақтағы Рсалы Сабыржанға қала әкімі 2 бөлмелі пәтер кілтін табыстады.
Айта кетейік, бүгінгі таңда Шымкент қаласында жалпы 34 спорттық ұйым жұмыс істейді. Оның 29-ы мемлекеттік меншіктегі спорт мекемесі болса, 5-і мемлекеттік жекешелік-әріптестігі аясында. Аталған спорт мекемелерінде 17 944 спортшымен штаттағы 925 жаттықтырушы оқу-жаттығу сабақтарын жүргізуде. Осы мекемелерде спорттың 71 түрі дамытылады. Оның ішінде, 38 олимпиадалық, 24 олимпиадалық емес және 9 ұлттық спорт түрлері бар.
