Бұрынғы Ауыл шаруашылық министрі, бүгінгі Жамбыл облысының әкімі Асқар Мырзахметов те әлеуметтік желіге тіркелген әріптестерінің қатарын толықтырды.
"Құрметті Жамбыл облысының тұрғындары! Аймақтың дамуы, оның әлеуметтік-экономикалық әлеуетінің артуы Сіз бен біздің «бір қолдың саласындай» бірлесе жүргізетін жұмысымызға тікелей байланысты екендігі белгілі. Сол себепті, бұл бағытта атқарылар шаралардың тиімділігін арттыру, нәтижелі ету – ортақ мүддеміз. Осы орайда, жергілікті атқарушы органдар мен халық арасындағы байланысты бекіте түсу мақсатында «Facebook» әлеуметтік желісінде жеке парақшам ашылып отыр.
Киелі Әулиеата өңіріне қызметке келген күннен бастап тұрғындармен, зиялы қауыммен байланыса отырып, бірқатар істі еңсердік. Алда жүзеге асырылар жобалар да аз емес. Пікір алмасу алаңын тиімді пайдалана отырып, облысымыздың қоғамдық өміріне, әлеуметтік, экономикалық және өзге де салаларына қатысты өз ойларыңызды, ұсыныстарыңызды білдірерсіздер деген сенімдемін" деп алғашқы жазба қалдырды Асқар Мырзахметов.
Жамбыл өңірінің басшысы бұдан өзге өзінің жаңа орынбасары тағайындалғаны туралы ақпаратты да көпшілікпен бөлісті.
Еске салсақ, бұған дейін Мемлекет басшысы Қасым-Жомарт Тоқаев әкімдерге әлеуметтік желіге тіркеліп, халықпен етене байланыс орнату керектігін тапсырған болатын. Twitter белсендісі болып табылатын Тоқаев жуырда ғана INSTAGRAM парақшасын ашты.
Әлеуметтік желіге келгендер қатарында Түркістан облысы мен Шымкент қаласының әкімдері де бар.
